Старажытная беларуская літаратура
Выдавец: Юнацтва
Памер: 350с.
Мінск 1990
205
Тую обмову его милость кгды княжа в коле поведил, тым вси были ображени людским повоженьем, же их милость знати не дают и не давали, и стерегли уплыненье ся часу сыноду.
Сынод зачали того дня. На самым року маршалка обрали духовные*, также поселств с килку поветов слухали.
У четверг заседали княжа воевода киевский из сыном княжатем, воеводою волынским*. Велми рано на свитанью (поехали) до его м(и)л(ости) пана воеводы троцкого, а были там годин зекгаровых болш пяти под полудень. В тым (часе) приехал пан канцлер с подскарбим и шли просто до воеводы троцкого, где и князя застали. И знову толко ж час не малый сами стравили. От себе слали послов до митрополита шесть особ духовных, 6 послов з места, давши до него моневе, и на писме доложивши в нем, абы часу не зволочил а з ними сышолъся и намовил.
Кгды ж тот зьезд толко народу рускому зложон, дознавши его быть, и тых владыков отщепенцами, оных за пастыров не мети, а иных обрать, а их зложить старатисе будут, если о собе справы певное не дадут публице, если при старой вере и благословенстве патриарха стоят.
Тых послов поткало княжа,— вжо ехали до митрополита. Тые послы митрополита зостали вже в панов сенаторов менованых. Которому кгды так поселство веселое прочитали, просили о цедулу тую; одно ей им не дано. Тые вси прошли от митрополита без отказу, обецуючи своих послать, яко зараз и прислали пана Прецвица*, кашталяна каменецкого, пана Шуйского*, третего — Каменицкого, инстигатора*.
Тые до княжати его милости широкими словы реч учынили о том поселстве, иж то с господы в(ашей) м(илости) ровне яко отповедь, або декрет яким был послан до митрополита, ображаючисе тым о то, иж им того там писма не зоставили, кгды ж они головного по того зьезде местце его кр(олевской) милости поведаючисе быть конклюзыи оной, одное справы без их милости быти не могла.
Княжа учинил обмову, иж тым был у их м(и)л(ости), однак держачи то от их м(и)л(ости) всих, же штокольвек чинили, то бачне чиним и при них стоит и стояти будет. Потом розвелися троха з речу до плачу, же се то они ничым (не) ображають: «Мы вси маем ся тым ображати от тых здрайцов наших, которые то наварили и от тых, хто им того помогает, вжды терпливе зносячи явную кривду, на бога помсту и оборону положив».
Потом поведил пан Гулевич*, человек досыть добре
206
годный, маршалок обраный, иж (не) княжа его милость, але мы все послали, а княжа его м(и)л(ость) ест яко одна персона. Если их милость и оные послы поведели, жехмы не до вас посланы, але до их милостей княжат, а до новокрещонцов и евангеликов* не мем жадное справы. На тот час, гды они будут, там ничего слушного постановлено быть не может. Он теж поведал: «Я теж вас не прошу, абысте який отказ чинили от мене».
Княжа теж оповедаючисе вобец, же ничего без них в той справе чинити и мовить без их милостей не хочет.
Потом по малой хвиле прислали их милости, же сами хочут быти у княжати. И приехал пан воевода троцкий, пан канцлер, пан подканцлерий* и шли на упокой до княжати*. По годинѣ мают быть у княжати, прислал до кола, иж хочут их милость у в(ашей) м(илости), а то вже было смеркшисе; чекали на них килка годин. В том образившысе тым вси, иж так долго на них чекают, кгды ж не вем, о чом намовы сами з собою чинят, где идет о всих нас и сумненя нашого. Прирекши у пятницу о 14 године зьехатисе и речи зача(тыи) кончити и разъехалисе, а гурмом з нареканьем. И то могли сенаторове слышать добре, бо были окна на улицу, а гук немалый теж был людей.
Назавтрее, у пятницу’, по мене прислав пан подскарбий и, иных собрав до себе, там же напоминая: а што ведать, якую с того потеху, обецуючы на потомные часы, ведучы до згоды; чего аниколи в нас не мог зъеднати з отказу, же мы не хочем быть таковыми, яко там тые отщепенцы. Он мне отказал: В(аша) м(илость) не смееш пана воеводы смоленского». А на том заплатил, жем не от его милости приехал, але сам от себе.
Потом ехалисмы до кола, до братии. Там же была инструкция поселств, читаных до всих земль и поветов: земли Волынское, с Подоля, с Подгоря, з Руси*, из Литвы*, зе Лвова, с Киева, с Премышля, с Пинска, же много их плачом были порушони, у послов самых привилев браты их, указовано колко постановеных порядков патриархи костентинополского. А по тым часе от к(о)р(олей) их м(и)л(осстей) конфѣрмованых доводов. За се на писме, што ведят, як много указалосе на митрополита, як писал до людей листов зашитых и отвористых, упевняючи их, иж не ведает, ани мыслит о том отщепенстве.
За тым реченье мовены были, не быти им послушиым, от духовных. Теж декрет на писме был наготован, коли пан каменецкий и з ним княжа воевода волынский^ от панов послов его кро (левской) милости (вернулисе), абы с кола
207
рыцерского было высажено депутатов чтыри, а з духовныя чтыри. Также много ани своих не ведаючы, иж до добрых речей хочут се зносит, до чого далися намовити, еднак не инде и (не) на иншом месте, одно там же, гдесмы заседали. В другой избе варовавши собе тож, абы их депутаты в жадную се реч без ведомости всего кола не вдавалися. Але поданые, от них слышавши, до кола принесли. Там панове сенаторове дали невинне нашим латине. А потом скоро казанье вчынил на две године княжа. Наши килку посланцов слали, зовучи своих до себе, што обачивши сенаторове, казали му кончить.
II пришли наши. Тот штосмы розумели, принесли нам, иж хочут згоды, абы папежа головою признати, календар приняти. На то собе не дали наши реч ани слова. Отказали до них через пана Древинского* и пана писара володимерского, иж на то зезволити не могут з многих причин. На тот час, аж не всим порадком тако верячы и неслушным поступком, зачалися (размовы) о направы в речах духовных, (казали, што) с так малою частю людей духовныя ничого становити не могут; але папеж нехай с патриархами о том намовит, або, порозумене вчинивщы, сенод зложат и о том становят, а мы без старших своих духовных о том и мыслити не хочем. Тыи принесли орацыи до них, жалосно учинено, упорными зовучы. За тым декрет от того наместника патриархового аферован. В том ноч зашла.
В суботу скоросмы се зешли до кола. Декрет патриаршый и проклятство на митрополита и владыки было по руску чытано, переложено з кгрецкого, барзо славы пиенкными и досыть жалосными. В том пан канцлер литовский прислав до мещан виленских, зовучи их до себе, которые пойти не хотели до их згоды. Тот же им отповедал, иж того з жалем и со клопотом уживете,— што они светчили в коле.
Пан маршалок теж наш усказал до пана канцлера, иж есте, панове литва, стратили,— тым преводим не мало панства до Полски. В том зараз от пана канцлера и от пана подскарбего пришли до княжати воеводы киевского инъстикгатор Каменский с килку слуг их, припоручаючы у тридесяти тысечей золотых оного екзарха, посла патриаршеского, завучы его шпекгом з Белъгор(ода) и до того Стефана* и попо зовучы их выволанцами*. На што княжа им отказал, иж не только ве тридесети тисечей золотых, але и в килкукроть сто тысечей приймую и на сейме их становити будут, а там се откажет, если то слушне выдают выволане на людей невинных. В хто слушне заслужил, на того не выдают. А коли колко был, а вказувано на то и грека.
208
Тот отец Никифор — Азар Протасый — сей якобы первоседалник по патриарсе*, пытая, что то за кголк. Поведал му по грецку, иж его припоручают. И встав на лаве, упросивши, поведил, иж. тот сам здрайца, хто мене здрайцою подоймовает. Духовный, жены, детей нимаш, абых се мел того подоймовать для набытя маетности, але и свое острадал для имени Христова. Але тые сами суть здрайцами, иж крадут християн, подмовляют, розные причины найдуют. И вказал привилеи своих всих чтырех патриархов* посланныя его в тот край зо всякою моцъю, якобы сам патриарх был доброволного приеханья на сейме, обецуючысе ставити, яко и станет.
Такъже княжа его милость, жалем будучы порушоный, вказал до пана канцлера и до пана подскарбего, иж нехай королем его милостю не грозят, бо он весть яко повинность и веру пану своему хова, и его фамилия старожитна, не новотна. Аяе нехай их милость мовят, (иж) мне грозят сами собою. Если што мают до мене, ставлюся их милости всюду, где ми кажут.
Потом прислали князя Шуйского и з другим якимсь лешком (мовити) иж в нас згода доходит в костеле, если воля в(ашей) м(илости) быть там з собою помоч быти. Поведил, же зараз пошлем. Десять человек с кола рыцерского, десять особ духовных, десять послов мещан выправлено, або протестацыи осветченые вчинили, (кгды) на то не зезволят. И возные были з княжатем и енералов* килка, которые кгды приехали до костела, там их до фортки гайдуки* пана подскарбего и пана воеводы троцкого и слуга не пустили. Они теж ехали назад з великою жалостю. А то было в суботу вже не рано.
Того дня княжа воевода волынский, волынцов и подолян мело быть не мало у пана подскарбего на обеде. И не были там, будучи тым барзо ображоны. Протестацыи не принято в замку нѣяких наших. Митрополита и владыков праве кгвалтом, слыше примушано до присяги. Они просили для бога на отложенье до сейму, але арцыбыскуп лвовский, бискуп луцкий, пан канцлер их упевняли ласкою кр(оля) его м(и)л(ости), обецуючы то им, привели их до присяги. А там же митрополит з четырма владыками присягнул на старшинство папежу, на календар и на артикул, иж дух святый от отца и сына походит, и на едность костела.
И зараз в неделю езуита в соборной церкви служил имшу. А Скаркга* казане поведал. А Потей службу служил у костеле в Рожейского олтара. Там же у олтара руского, где служил римлянин, в келиху вино у кров барзо шпетную,
209
смродливую обернулася, же тот езуита не поживал. А у олтаря римского у Потея вино обернулосе у простую горкую воду. Там же у Берестью нашолъся было человек якийсь простый, который великие речы мовил, же страх слов его людей преникал, бо писмо все напаметь знает. Штось дивного? Певне не тот, што мел у голову заходити*, и напоминал, абы людей своей веры модность держали. Тых лотров —• митрополита, их владык — не видали, бо их не пустили римляне.
Того ж дня в суботу зараз з костела пан воевода троцкий приехал до княжати, пожекгнал, жалуючи незгоды, и ехал до Чернавчич. А мы в неделю вси разъехалися, заварши то и запечатовавшы и подписавшисе до того писмом, албо универсалу его кр(олевской) м(и)л(ости) послалисмы. Ужили пана Гулевича, маршалка, а пана Еламолинского и пана Броневского* — людей годных. Праве два евангелицы, а третый (з) новокрещенцов.
КНІГІ ОНЛАЙН
