Старажытная беларуская літаратура
Выдавец: Юнацтва
Памер: 350с.
Мінск 1990
Року 1599 у вилию Рожства Христова по старому (стилю) рачил быти на чести у Баркулабове у его м(и)л(ости) князя Богдана Соломерецксго его м(и)л(ость) пан Лев Сапега з многими зацными паны велможными у месте Боркулабове.
214
Того ж року 99, месяца генваря 6 дня, у в олторок князь Петр Жижемский, староста речицкий, рачил заручити панну Крыстину у его м(и)л(ости) князя Богдана Соломерецкого, старосты крычевского и олучицкого. А веселе был року 1600 по святом Крещении* в неделю.
Року 1599. Тот рок был велми меженский, албо голодный: жита куповали чверть по таляру, а мера жита по две копе без двадцати грошей; а предсе здоровый на люди. А куповати збоже было везде много так у домах, як и в торгу, толко дорого.
Року 1599, месяца мая 27 дня, праве в семую суботу церкви Боркулабовское дочка жидовки Маръямки, арендарки боркулабовское, именем Стирка. И пилне слезне упадала и просила священника боркулабовского Федора Филиповича для бога, абы была прекрещена у веру християнскую. Яко ж порадившисе с паны постронными, з боярами, земянми* з шляхтою и з урядником боркулабоским паном Федором Плетинским, наупоминаючы писмом тот умысл християнкою быти, ни дтя малженства, абысь мела за которого человека християнского замуж пойти, албо для лакомства маетности, але правдиве.
Оная жидовка именем Стирка тыми словы отповедала, стоячи пред церковью, пред всѣми зацными паны и пред народом християнским: «Иж, дей, я, панове мои, вже давно з молодости моее, а правдиве, дей, вже полтора року, яко сама ся на то позволила, просячи со слезами господа бога и кладучи честный святый крест, ложачися и вставаючи, на лицы своем, абы мне дал то видети, християнкою зостати. С хутью и з великою радостю того прагну Христову веру мети».
Яко ж назавтрии в день сошествия святаго Духа з народом божим и много множество панов, шляхты, людей учтивых так мужей, яко и жон и детей, яко ярмарочного часу крещена была, у ваннѣ погруженна, и названо во святом крещении именем Елена.
Того ж дня матка ее Маръямка с криком, с плачем, для бога просечи, приходила тут же до крестилницы, падаючи просила, абы ее не крестившы пустили, обецуючи за то великий поклон и подарок дати.
Яко ж нѣкоторые мещане видели многое чарованье оное Маръямки, што она поганскими чарами египетскими дочце своей чинила. Яко была везена до их милостей князей до Буйнич, оная Маръямка, улезши у лазню студеную, голову открывши, волосы распустивши, печку розметала, чаровные поганские слова говорила, проклинала, обема руками назад
215
кивала, ноги свои везала, иного много зла, поганства творила, проклинала, абы жива не была.
Тот рок 99 был велми урожайный, добрый, здоровый, погодный, на всем добрый. Жито куповано чверть по грошей петнадцать, а мера по 40 гр(ошей), овса чверть по 4 гроши, мера овса гр(ошей) 16. Жито, гречиха, овес, пшеница — на то на все велми был урожай добрый.
Року 1600. Того року была зима люта и снежная. Благовещение было на святой недели* в (пя)ток. Почали орати по святе на четвертой недели.
Того ж року, месяца апреля у понеделок, на святаго Мартина*, папы римъского*, взявши з науки от Лаврентьтия (Зизания) зараз дано (пана его милость Богдана Соломерецкого) до науки латинския, до пана Максима Герасимовича Смотрицкого*.
ЛИСТ ОТ ПАНА НЕКОТОРОГО 3 РОКОШУ* ВЫПИСАНЫЙ О НОВИНАХ РОКОШОВЫХ
Новины в(ашей) м(илости) ознаймую, которые ми в тую пришлую среду праве вседаючому, на рокош с Подляша* мене дошли. Препис з листу слов власных до мене писаного в(ашей) м(илости) выписую. Нещасливые новины моему милостивому пану ознаймую, же наши битву з рокошаны програли; што кролевской милости пришло людей тридцать тысечей чужоземского на помоч. Который, надею великую маючи, а до того рады злое услухавши, легце собе важечи панов рокошан, которых не было болш над пять тисечей, хотев их смерти. Але они плац утрымали. Хотя з обу сторон немало пало, але еднак стороны нашей чужоземского люду, немцов, немало пало. То уже битва была по выезде моем с под Вислицы. Зачым тут наши мазурове* и подляшане и инших воеводств бегут заразем за ознайменьем оттамътоль, от панов депутатов, як на кгвалт, яко перепис универсалу тые новины от понеделка 8 дня октобра на выезде моим тые новины принесены.
УСИВЕРСАЛ РОКОШОВЫЙ РОКУ 1606, МЕСЯЦА СЕН(ТЯБРЯ) 25 ДНЯ
Мы, рады и станы рыцерские, которыесмы се тут до кола зьезду рокошового, для актикованя справ Речы Посполитей, на тым рокошу намовеных, такъже и давано знать о респонсе его королевской милости на поселство от нас да не депутоване, и тут на том местцу зоставлени суть всим
216
их милостем коронным и в князстве Литовским обывателем ознаймуемы, иж дня вчорайшого од его королевское милости их милость панове послове нашы воротилисе и з отповедю и з респонсем нам всим, не тылко барзо жалосным нам, не тылко очекиваню нашему, але першим респонсем и деклярациям его кр(олевской) м(и)л(ости) противным. Бо место того, в чом есмо од его кр(олевской) милости отух отрымати мелисмы, тераз згола ничого, ани наветь дирректум респонсум на жаден артикул не однеслисмы и овшем усим правам пригана, яко бы не слушне, не уважне, навет и не побожне в нас подане быть мели ест учинена. Затым турбоване Речы Посполитой ест нам приписано и пены таковым служащие на нас с прегрозками суть захрона зась и устификованьем тым, которым от рады злые, ад абсолютум доминум служаще, коле нашым вина была дана.
А тот ест ефентия респонсум его кр(олевской) м(и)л(ости) против зданю пред ним сенаторов до него, которая она рада ад абсолютум доминум служонца, которые тераз, яко иншые уразы Речи Посполитой тылко негкативе там зноша*, юж праве скутечне выража, кгды ж при тым наступила резолюция талия, аб(ы) ту на нас з войском натрет. А тот рокош кровию нашею обляти, их конатус наше про реипублице боно предсевзяте розервать. Такъже бы нам до далших косултаций и попартя прав, волностей наших прийти не могло до которых консултаций, иж в респонсе нашим на посельство кола тамтого Вижлицкого даным одозвали мы се ту ани кгвалтовным на нас наступом попредити и розервати хотят, если им до конца цнота зацного рыцерства в том якого не учинит встроту, которые, яко мают ведомость, почуваютъсе в том, што отчизне, што волностям шляхецким на своим повинни так се декляровалти, же рачей нам Речь Посполита допомочи хочет, ани ж бы на нас брони свои поднести мели, иж теды юж праве от решт иде.
А иншого ратунку на тот час отчизне нашой не видимо. В(ашей) м(илости), наших милостивых панов и ласкавых братий, просимо, абысте в(аша) м(илость), яко на кгвалт, с тою готовостю овде посилатьсе и з оною Речи Посполитой опатроватся в(аша) м(илость) рачили бежит нас посилят тые, што суть поблизу зараз. А што одлеглейшые, на день 19 месяца октобра, тут под Сондомир, жебысте прибывать в(ашей) м(илости) рачили, где и респонсови его кр(олевской) м(и)л(ости) и той то, которой еще и некоторые прагнут о практыках постронных информации при
217
патрившисе до завартя, зась сполна до пана бога згода рокошу того приступити нам прийде. А мы тым часом, на той стражи будучы, кгвалтови, праз и волностей нашых одпор давать и оным здоровъем своим заставятсе не занехаемо, где бысте в(аша) м(илость) нас рихлым прибытем своим, такъже и ратунком пенежным до затрыманя и причиненя людей служебных посилить не занехали з рук в(ашей) м(илости) пан бог крви нашое апостерегает, прав и волносте(й) утрачоных певне бы патрали. Але и сами пострадавши милых свобод юкгум серенитатис про патрия, а на кгарлах своих* носячи дни з неулитованым жалем провалити и кончити бысте мусели.
А еднак мы статечне в(аша) м(илость) против Речи Посполитое и против нам, братии своее, взаем (адв.) ною милостю жадного не маючи вонтпеня певнисмы, же в(аша) м(илость) в той ледво не остатней юж то ни Речи Посполитей и нас, братии своей, отбежати не будете рачили, могучи звлаща в добрым уваженю о вси поступки зъездов прешлых с того рокошу, же ничого иншого, едно што до варунку и беспеченства Речы Посполитой и целости прав и свобод наших належит, то собе ничогось важачы.
А с другой стороны, абы кандоре, яко щирий их противко нам поступок лацно уважити, бо кгдысмы за суспициею, которою нас неслушне в огиду подавали о замыслу отмѣны пана з себе з речью самою знесли оседчат, и он цѣ тож, же направы самой Речи Посполитой такой еднак, которая бы не проформа без скутку, але ретелною была, потребуем.
Они своими артикулы нас зарутили роботе нашое, ми на прерыпендии, нас хотячи отразити, зараз зь инъшей меры, на нас натирати, вси поступки наши потопят, абы так зачатой окултате реймен вцале зоставал. Не занехало затым в(ашей) м(илости), паметаючи на тот звязок конфедорации*, прикладом продков наших межи нами учиненую, на (л.160) которой имена свои зъ обовязком вѣры, почтивости и сумненя с подписом рук даже, се же ни в чом не отступуючи, скутком и речью самою оное выпелнит и досит оному учинити будете в(аша) м(илость) хотели дать в Сендомеру 20 дня месяца вресня, року 1606.
Миколай Жебрыдовский, воевода и енерал краковский;
Ян Швейковский*. Рукою своею;
Самуел Ташицкий, депутат воеводства Краковского; Войтех Сосницкий, депутат воеводства Виленского; Федор Субчавский Проскура, депутат киевский;
Петр Стабровский, каштелян пернавский, рукою;
218
Станъморский з Морска, рукою своею;
Иоан Сулигостовский з Сѵлигѵстова, депутат воеводства Судомирского;
Станислав Стадницкий*, староста жикгволский, депутат воеводства Руского;
Януш Радивил, маршалок зьезду рокошового;
Иоан Гаръбурт с Тулщына*, хоружый лвовский з Руского воеводства;
Миколай Щенец Сондомирский;
Войтех, страж Белахова;
Одровеж, депутат повету Опочинского;
Героним Прылецкий, депутат с повету Освоитского Заторского;
Ян Лемахий з воеводства Любелского;
Героним Милиша, депутат воеводства Белского
Павел Рашовский з Рашова, депутат повету Высокогорского;
Ян Швейковский до книг подал рукою своею.
РОКУ 1606. АССЕКУРАЦИЯ, ТО ЕСТ ВОЛЬНОСТЬ
Миколай Жебрудовский з Жебрудович, воевода и енерал краковский; Ян Хоронский, снятинский староста; Януш Радивил, княжа на Биржах и Дубниках, подчаший Великого князства Литовского.
Ведомо чиним всем и каждому зособно, иж мы, дознавши ласки его кр(олевской) м(и)л(ости) пана нашего*, всѣ покое и в той то Речы Посполитой замешане, абы далей до крве сполней братии нашой розлияня не пришло, а то в том, же тая ассекурация его кр(олевской) м(и)л(ости) под Вислицею братии нашое обывателев панств тых дать тут упевненьем своим панским утвердити того не занехал, же на вси помноженя прав и свобод тое сполное отчизны нашое, на которое бы ся над вислицкие артикулы сталы, тое Речи Посполитое вси згодитися позволит и близко пришлом сейме ест готов. Для того упевняем в том его кр(олевскую) м(и)л(ость), пана нашего милостиваго, иж люде вси пенежные, которые мы под тот час над звычай зобрали были роспустимо и потом хоругови подносити не будем, ездов жадных и зобраня братии через универсалы иншые складати не маем. И тых, которые суть (л. 161) через нас зложоны, не только сами занехаем, але теж и друтих от того отводити будем, стараючися о тое пилностию, абы тые речы в том замешаню узрушоные, успокоены были и далший узрух першей турбации в Речи Посполитой не чинили.
КНІГІ ОНЛАЙН
