Старажытная беларуская літаратура
Выдавец: Юнацтва
Памер: 350с.
Мінск 1990
228
служалого яко убогих, так и богатых полупивши, шаты добрые з них собравши, брони поотнимавши, нагих, босых за границу выгнавши, попускали.
А то за великие прикрости литовские и насмеванье полское сталося им, иж был збудовал царь Дмитр ку воли жоне своей на Москве костел полский и мниши служили службу божую, а з руских церквей великое насмеванье чинили, попов московских уруговали, з них ся насмевали. (Масквичы) мели то собе за великую кривду и великое зелживости своей, не хотячи у царстве своем, абы была вера ляховитинская, бо в них того от веков не бывало, ани хотели того во царстве своем мести. Прето их побили, помордовали и с царства своего Московского проч выгнали, а себе на царство царем помазали Шуйского*.
Потом того ж року 606 господарь, кроль полский Жикгимонт Третий, послал гонца своего о том до Москвы пана Яна Кгенсевского. И того там же на Москве посадили, и седел тот гонец много.
Того ж року 606, месяца июня 5. Почался почивати якийсь рокош. Там же на тот рокош зьедчалися панове руские, пруские, жомоитские, мазовецкие, подляские, волынцы, литва, поляки,— згола от всих землей и поветов панове велможные, панове зацные всяких вер, всяких языков. И стоял тот рокош у Сондомиру месяцей шесть. 5Іко ж там тот край выгубивши, выпаливши, спустошивши от Покрывници две миле, и не учинивши и не постановивши ничого доброго, у восень о святой Покрове розехалисе проч.
Тот рок 606 з ласки божей добрый был, толко на фебру много было хворых. А збожю была цена: жита мера по гр(ошей) 24, овса мера гр(ошей) 14, гречихи мера гр(ошей) 20, ечменю мера гр(ошей) 20.
Той же рок 606 велми дивный был. А то в том, иж вода все лето так была велика, яко праве весне. Не толко летом, но и о запустех Филиповых: раз упадет, потом прибудет; и з берегов выливалася. Прето сена велми мало косили.
Року 1607. Тот рок з ласки божей был здоров на люди, также и врожай збожу средний был, также и цена збожу была: жита чверть гр(ошей) 8, пшеница чверть грошей 6, ечмень гр(ошей) 6, овса чверть грош(ей) 5, гречихи чверть гр(ошей) 4.
Нижли того року 607 великая была незгода и замешане кролю с панами, паном с кролем, з рокошанами, великий бунт, забите, кровопролите; от господаря кроля на домы насылане; шляхте шкоду великую починене. Велми страшно было слышати, албо тым, где се то деяло, видети. Яко ж
229
и конституцыя* были выдали релии греческой, а потом за великою (невзгодою) и дивными справами разорвалося. На том так не постановилося, толко великое забийство, мордерство, кровопролитство поделали рокошаном. Яко ж о таковом постановеню рокошанскому тут же в том року 606 есть вышей описан(о).
В том же року 607 было великое на християне и немилостивое жолнерство, лупежство. По местах, по селах жолнери берестейские, жолнери кгроденские тые по волости кролевской капщизну брали, а на панских и княжеских (землех) приставство на подданых вытегали. К тому зась особливе жолнеры Лисовского, жолнеры Кгроденского тые по подданых кролевских и князских, панских, шляхецких великое и немилостивое приставство албо стацию по волостях брали яко збожем, так же и пенезьми.
Того ж року 607, месяца мая, после семое суботы ишол со Шклова и з Могилева на Попову Гору якийсь Дмитр Иванович*. Менил себе быти оным царем московским, которые первей того Москву взял и там же оженився. Бо тот Дмитр Нагий* был напервей у попа шкловского именем, дети грамоте учил, школу держал. А потом до Могилева пришол, такъже у священника Федора Сасиновича, николского (попа), у селе дети учил. А сам оный Дмитр Нагий мел господу у Могилеве у Терешка, который проскуры* заведал при церкви святаго Николы. И прихожувал до того Терешка час немалый, каждому забегаючи, послугуючи. А мел на собе оденье плохое: кожух плохий, шлык баряный. В лете в том ходил.
А коли были почали познавати онаго Дмитра Нагого, в тот час з Могилева на село Онисковича Сидоровича* аж до Пропойска увышол. Там же у Пропойску были его поймали, во везенью седел. А потом пан Рагоза, врядник чечерский, за ведомостю пана своего его м(и)л(ости) Зеновича, старосту чечерского, оного Дмитра Нагого на Попову Гору, то ест за границу московскую пустил, со слугами своими его пропровадил.
А коли приехал до Москвы*, то ест Поповы Горы, там же его Москва по знаках царских и по писаных листах, которые он, утекаючи з Москвы па замках написавши, давал. Через тые уси знаки его познали, иж он ест правдивый, певный царь восточный Дмитр Иванович, праведное солнце. Тут же почали радоватися. В шаты, убиоры каштовные одѣли. Потом конного люду семъсот до него прибегло. Тут же почал лысты писати до Могилева, до Оршы, до Мстиславля, Кричова, до Менска и до всих украинных зам
230
ков, абы люде рыцерские, люде охотные до онаго Дмитра Нагого прибывали, гроши брали его. И заразом с Поповы Горы оный Дмитр Нагий, сей мнимый царь московский, осел замок московский Стародуб. Тепер же почался люд гулящий, люд своволный скоро Дмитро той и молодцы. Якийсь наймит з Мстиславля до него пришол.
На тот же час на Москве (сел) царем князь Андрей Шуйский*. Тогды, собравшы войско, Дмитраш и почал войну творити з Москвою и с князем Шуйским. Нижли одны москвичи признавали его царем быти и самая Москва и вси болшые бояре московские и иныя.
Многая Москва, которая первей его добре знала быти царем московским, (рекла) ино, дей, якийсь вор московский, а другие поведали быти и называли его так — плут. Итак до оного Дмитра Нагого москва писала быти его таким — царь вор, Гриша Отрепич, рострыга*.
Потом зась явился другий царь на Москве именем Недведок. Тот Недведок з людом немалым сам передался на Москву царю Андрею Шуйскому.
Теперь же почали войска до царя Дмитрия прибывати, войска великие, войска силные. Отселся з Литвы Руцкий з ротою, Лисовский, Велемовский, Сапега, и иных много. А з Низу роты великие: князь Вышневецкий з ротою, князь Ружинский* з ротою. Там же (прибывало множество) волынских, подольских зацных панов з ротами. А з Полщи пан Стадницкий з ротами великими.
Там же на Москве в тот час бог ведает, што ся там деяло: места, замки малые выплендровали, але под столицею все лето стояли, много штурмов утратили,— не достали.
Там же купцы шли многие з горелками, и тые великую шкоду Москве делали, хотя купцы. И тые жолнерами себе поведали быти. Яко ж оные жолнере и вси купцы, которые там на Москве были, чудно и велми дивно о цари Дмитре поведают: якось дивне у войску справует, иж, дей, у ночи не спит, толко убравъшися во платье леда каковое, то...
Року 1608. Летом великие и силные войска ишли на Москву до царя Дмитра. А нам в том краю силную, великую шкоду починили у статку, а наболшей у конях. Тые то ишли жолнеры, имена их описано в року 607.
Того ж року 608 розгневане божее было — много псов устеклых попсавалося, коней и людей много покусали и (тые) померли.
Того ж року 608 патриарха вселенский кир Рафаил переставился. Того ж року на местце его был посвящон вселенским патриархом именем кир Неофата.
231
Того ж року 608 лето было мокрое, поводки были частые. Мало хто при реках великих сена косил, бо и до восени поводки великие были.
Того ж року 608 много деток малых з воспы померло.
Король Владислав* ишол под Смоленск в року 1633. Шеин* на тот час з войском великим под Смоленском был и королю Владиславу поклонился и делы его, что Смоленск добывал, королю Владиславу досталися. Меновите."
«Однорожец» сажний* три и болей 1
«Кгранат» сажний чтыри 2
«Гладки» сажний три 3
«Кречет» сажний три 4
«Волк» сажний три 5
«Царь пушка» сажний три и болей 6
«Коваль» сажний три 7
«Юрей» сажний три 8
«Пасынок» сажний два и болей 9
При тых и иншых дел малых припроважено з Смоленска, числом всих...
УСПАМІНЫ Ф. ЕЎЛАШОЎСКАГА
Самому пану богу моему зо всяких добродейств его насветшое милости нех зостава вечна честь и хвала, за которого презренем и я, Федор Евлашовский, уродилэмсе от вышэйпомененых родичов* моих в Ляховичах в року от нароженя сына божого тисеча пятьсот сорок шостого, месяца февраля семого дня, в неделю ночи пришлое около полночи. И дано ми име ведлуг свята руского, которое было на он час в понеделок месяца февраля осмого дня, а у рымянов положено ест месяца марца второго дня — Теодора, гетмана, от Лицыниуша змучоного.
А яко мелом вядомость от родичов, же в рок по уроженю моем премовилэм до отца моего «абба», з чого се они урадовали. Але я намней потом не мовил, аж в полчварта року от нароженя моего почалом мовить.
А в пятом року почато ме бавить наукою рускою, кгды ж в тых часех в тэй нашей строне не было еще инших наук. И для того ж пришло ми зостать з рускою и полскою наукою, и пожидовекы написать умелом. Але тое писмо их потребуе умеетности езыка эбрайского, або хоть немецкого; кгды ж вжо тепер Библия* жидовская немецким езыком выдана, чого полским езыком учинить бы се не могло для ортокграфеи, якей в ынших языкох не маш.
232
А потом, удавшисе на службу, трафяли ми се таке паны, которые ме оборачали до браня поборов и чиненя личб, порозумявши на то з натуры способного. А пан бог был завше со мною.
А потом, за наступленем и поднесенем войны от короля его милости Жикгимонта Августа* с кнезем Иваном московским*, былэм первший раз на войне, где и битва была нашим щаслива над москвою року 1564, месяца ген[варя] 26, на Иван полю* над рекою Улою.
А потом аж до уприкреня были ми частые язды на тые войны*, а яко юж тераз упатруе, мало потребные, бовем же и Речи Посполитой пожитку не веле тэ войны приносили. А мне паметнэ зостали для утерпеня велких пригод, трудности, шкод и невыповеданых невчасов.
Самому ж пану богу хвала, же ме зо всих их выбавять, а, праве, на некоторых местцах цудовне охранять рачил, давши ми, праве, у вшитких люди вдячность, ласкэ и учынность над надее мое. А неприятелей, которые некеды з зазрости повставали и кгловы свои подносить хотели, значными плякгами отврацаючи, а упорных и дивными припадками з света згладжаючи, жем юж, праве, такою ласкою божою не толко убезспечоный, але и роспещоный будучи, никгдым се ку оброне от неприятель моих не готовая, аним се за слова их брал, очекиваючи власнэй нашей помсты божей, ктора тэж никгды не омешкала. А друкгды и вэ мне самым аж плач и вэлке порушене в духу чинила. Уважаючи так вшехмоцнэкго, велкекго бокга незапаметане мне межи незличоным людом, яко робачка малого, и непажаловане трат моцнейших на мене ку обороне моей.
КНІГІ ОНЛАЙН
