Старажытная беларуская літаратура
Выдавец: Юнацтва
Памер: 350с.
Мінск 1990
Потым на первшы съем з вядомостен кролевскон сестра Влодымирова, которая ту с Полоцка з мужом была взята, позвала была пана троцкого. Там также сам пан воевода виленский пана троцкого заступовал. А маючи вшытэк сэнат по собе, кроля ублакгал и сестре Влодымзрове цось пенезми дал.
На он час при забитю Влодымира кроль в тым свым запаленым гневе написал был цэдулэ рукою своею: кто был Влодымир, яко лят двадцать четыре стравил на дворех кроля вэнкгэрского и полского, мужне завше в речах рыцэрских поступаючи, а тэкго дня у спикненю и збунтованю людским згинул. И хтял то меть на хоругви над гробэм его.
Ям был добре вядом Влодымера. И не учинил того он с пыхи якей, не чапкуючи пану Троцкому, але з мелянколиэй свэй велкей, же, ядонц, сам з собою мовил, мыслил. И частокроть на спотканю з паны миял их, запомнявшисе, хоть кго друкгий чапкованем почастил. То аж напомненый от слуг, волал за ним, волал за бога просечи, абы не мел за зле.
В тэж часы был у кроля в Вилни гонец московский, стараючисе о вызволене вязней и о примире.
Року того ж 80, чирвца пятого дня, дворяне кролевские, зослани, во Троках поймали и, приведши до Вилни, Григора Остика дали до везеня пану маршалкови. Которого потом, судивши и неяких намов и порозуменя его з Москвою досвятчивши, дано его стять 18 дня того ж месяца чирвца в месте Виленском пред костелом Свентоянским. А кроль яко вчора выехал был не войну, и был потом под Луками.
В Слуцку на тот час были 4 докторы: сандомирский Бартолян, краковский Мартин Фоксос, любелский Лаврэнцыуш, слуцкий, тэж старый и добрый. Там се веле панов, пань и розного стану люди были на лекарство зъехали. И яко кому пан бог здарил, отправовалисе.
Року того ж 80, вресня 5, король его милость под московский (князем) Луки взял был. И люди под меч дано было, яко упорный. Который замок потом за примирем вернен московскому.
В тэж часы пан Филон*, убэзпечоный през фальшиве шпекги з невеликим людом, припал был до Смоленска. А там велке войско было московское, же аж тэй же ночи Филон
247
уходил. Люди наших сила погинуло. Там же суседа моего Михай[ла] Зверова, москвитина, поймано и обешено. Был ми то велким неприятелем. Пане боже, отпусть му!
В том же року был кроль его милость, змовляючисе о потужности пришлое войны.
Року 1581, генваря 20, в пятницу, жона моя мила Ганна Болотовна уродила мне сына Яохима ту ж предэ днем, а на цалым зэкгару годины 14. Тот на сесь час вжо то три роки во Влошех у княжати Мантуанского. Пане боже, му блокгослави!
В мес[яц]ы чирвцу Москва, невядоме в руске земе вторгнувши, огнем, мечем и забранем велкие шкоды починила.
Того ж лета и в есени, в року 81, король Стэфан был под Псковэм, гдем иж пре [з] хоробы мое не был. Слухам рад инших, кторы, вядоми будучи, о том выписали.
Бородич пан Иван, повинный мой, едучи спод Пскова, умарл в дорозе кгрудня 22 дня, а похован у Кгравжишкох.
Року 1582, названого от мене нещасливого с пэвных причин, же ми в ним марца 22 умарл милый, а едыный же у мене рожоный брат мой Иван в месте Виленском. И не дошла ме та вядомость пре[з] злую дорогу аж за тыйдень. А през который тыйдень, будучи я в дому моим, яко У тридцати милях от Вилни, тэскнилэм барзо, жаловалэм и мовилэм до жоны моей, же запэвне ми брат умер. Так то сэрца людцке чую[ть] здалека припадки дятэк и милых приятелей своих.
А прото ж ездилом до Вилни и далэм тело его поховать, водле порученя его, у светое Тройцы в цэркви руской. Зажилэм жалю над обычай и злое дороги.
А едучи назад, ледвосмы вси не потонули на Немне реце под Ивем. Ям был з гостем* якимсь едэн там приехал. И юж се з нами п[а]ром починал был на нутре заливать. И так напоминаючи превозников, абы се не ленкали (бо юж были шосты порутили, мовечи, же гинем), а горечо пану богу се молечи переехали.
А после слуги, з возом моим и со всеми конми едучи, на том же местцу тонули. Кони спыхали, а тым болшей лодки заливали, же все дощечки вода знесла. А воз предними колы завесилсе в лоди, ктора на кгуре шла. А другая се лодя у воде за ну рыла. Люде превозни и слуги мои были в лоди. А инши, побравшисе конем за окгоны, не ведели, што се з ними дее. Ано коне шли тэж за лодею вниз, куды вода несла, аж е потом на берег, где и я был, принесло межи
248
лозы. И там се рятовали. Ово толко, здумявшисе дивным судом божим, хвалилэм насветше име его.
Потом сен[тябра] 23 отдалэм сестру мою панну Зофею за пана Щасного Самсоновъского.
Месяца паздэрника 21, в неделе, умерл зацный и богобойный муж Иван Третяк, приятель дому нашого. А по нем декабра 10 умарла добрая тэж приятелка моя, пани Твиклинская Дорота Кграбовская. А сам (муж яе) по ней на великон ноц умарл року 83.
Року 1583 по Кгромнице зима се постановила модно по первших неуставичностях.
Мялэм на тэн час у себе велким приятелем староста ляховицкого пана Сымона Шлятковского, кторему дня 21 лютого жона Сулимянка умарла з великим жалем веля люди. А за нею в том же року, новэмбра 18, и сам Шлятковский умер, чловек привелкон доброть свое вечне кгодный памети.
В том року 83 пани виленская в повете Новгородской мешкала. А я з роков на другие роки уставичне и в розные поветы: до Новгородка, Менска, Слонима и Волковыйска ездить мусял. А в посте мусялэм у Вилни (быць) и знову о святках там же быть для справ задворных, которых се намножило было. Мандатов всих было 17. Розмышлялэм в себе, яко за живота пана виленского и едэн позэв по некго не был, але се тепер накгродило. Приятеле не дбали на онэ захованя давнэ, кождый своего щастя смотрел. А Ходкевича жадного в раде кролевской не было, а наконец и даровать му не мели, вэтуй, пане боже, на потым.
Року 1584, февраля 5, оженилсе был пан Мартин Окунь с панною Боянэцкою. А назаютр оженилсе пан Ян Монвиж с панною Мложевъскою. Отправовала тэ весэля пани виленска в Ляховичах з велким достатком, ова вшистко пекнэ часу своего.
В марцу мел справ панских сила у Вилни пред кролем, и в речах кролевских пилновалэм, и взывано ме на интыкгаторство.
В том року пани виленская мяла затруднене не малое з Матфеем Волком, который, маючи еще от самого пана его милости фолварк ляховицкий Павлюковский у петисот копах грошей, справил был собе другий лист неправдивый на ДРУгую такую ж суму пенезей, для чого аж сама ездить до права мусила и очевисто первей у земствах, а потом и у кгродку фалш задавала. Потом же он того листу отступил, и то аж у пришлом року. В том року 84, августа 28, уродил ми се сын мой Лаврын.
249
Року 1585 зима была барзо тепла. Быдло на полю бывало и колы ездчано. Пан Кгзовский старый в лютым паралижэм рушоный, а 8 марца умарл.
Мая 26 перун замок на Мыши запалил, который бардзо прудко згорел. Того ж дня, а подобно в одной године, ударил перун в дворе моем у сырницу и голубинец, але не запалил и не забил ничего. Дите ту ж было и голубята в голубинцу.
Того ж року, месяца новэмбра 3, жона моя сына Мартина уродила в ночи на 13 године.
Року 1586, будучи мне у писара ляховицкого Федора Зенкевича на чти, у других зваде а за моим розважаню, ранено ме в руку левую и неведялэм от кого. А то было стычня 19 дня. А кгосподар был цалый. Предсе потом врыхле 23 лютого умарл з горючки. Потом в марцу былэм у Вилни для потребы Кгославского и ездилэм до Ковна.
Там же ми марца 5 дня, ночуючи у Рынконтах, разбойницы мало были не забили. Але за ласкою божою вилневцов обоз немалый до тое ж стодолы наехали, а разбойницы поутекали. И кгосподар якись тэж нецнота, вымавялсе, же што мел чинить, кгды ж на ноч збересе немало и што хотят, то чинят. Самому пану богу хвала за его оборону!
Там же, до Вилни звротившисе, далэм был пенези Кгославскому на имене его Скубятовское первей заставою, а потом и на вечность купилэм.
Кроль его милость мешкал того лета в Городне, отпочиваючи от первших прац свых, юж се тэж часом капэлюшэм и рукавицами не мерзил, з чого венкгрове сперва шидили. Бавилсе тэж выеждчанем на поле з мысливствэм.
Мне того лета пришло внет (тэрмінова) и по двокроть в потребах пани виленское и дятэк пана моего быть. Яко ж мяновите липца 24 мялэм пред кролем справу з Тарановским безносым, кторый по змови з иншими жолнэрми, яко то хорый, на то выставеный был. Розумеючи, же у кроля вмясто ялмужны мел отрымать презыск на добрах панских за заслужоное свое, за чим бы инсымплио [!] своих долгов вси дойти могли, позвал был паню виленску и дятки о три тисечи золотых. И кгдым указал истоты кролевске и его самого, яко веле у скарбе славное памети пану Виленскому и жолнэром винно, а потом указалэм протэстацыэи сеймовэ,же се заплаты упоминано, и яко се змовили жолнэре, и яку бы шкоду' детям пана моего принесло, тэды, по одстапеню моим (яко потым от панов ведял), в так яснэй речи вакгалсе кроль длукго, если то отложить, яком я про
250
сил, до заплаты тых сум з скарбу кролевъского, чили зараз присудить на добрах панских. В чом от панов рад, а мяновите пана Воловича, пана виленского; пана Глебовича, воеводы троцкого; пана Лва Сапеги, канцлера, пана Войны, подканцлерого, спартый будучи, так позволял, мовечи же, конечне, бых ям тэ заслужонэ тому жолнэрови на добрах пана виленского присудил, бы не указано тых протестацый сэймовых, же се упоминано заплаты именем своим и всих жолнэров. И так нам отложоно до заплаты з скарбу, ведля истот кролевских. Веде то бог, кгды то будет.
Там же в Городне на тот час июля 12 умарл пан Михал Гарабурда, впадши в горючку пято дневную. Не могли докторове ж Буцэла и Сымона урятовать. И тремя днями пред его смертю ознаймили кролеви, и уряды его были назначонэ и упрошонэ иншим.
В том тэж року, окрутного кгрудня месяца 12 дня, тот славный и велцэ зацный пан и монарха велкий, король его милость Стэфан Баторый умарл на замку городенском в милых палацах своих от него збудованых.
Шкода кролю, жесь по велких працах, кторых ест ее был з млодости приучил, и тэ лят килка Городном се у отпочиваню своим забавил. А моим зданем, где бысь звыклэй працэй уживал, еще бысь был далей потрвал. Але певней ведял то пан бог, чому так, а не иначей меть хтял.
Рок 1587. Стьгчня 9 снило ми се, о чим я не мыслил, жем был в месте влоским Мантуи, видял кнежей Мантуи, положене замку, места, вод, мостов мурованых. А кгдым то поведял пану Андрееви Скорулскому, кторый там бывал, поведял, же там положеня власне так, яко се мне снило. То, снать, презентовало ехане (туды нам сына моего милого Явхима, кторый в року 1575 еще поехал и по тэн час там мешка.
КНІГІ ОНЛАЙН
