Старажытная беларуская літаратура
Выдавец: Юнацтва
Памер: 350с.
Мінск 1990
Теже Моисей, хранящим закон Ветхий, не обецовал толико землю добрую, текущую млеком и медом. Наш же спаситель, Исус Христос, обецуеть, полнящим закон новый, светое Евангелие, отпущение грехов, ласку божию, дары духа святого, живот вечный, царство небесное, яко сам ко апостолом рече: «Аминь глаголю вам, яко вы шедшей по мнѣ в паки бытие, егда сядеть сын человеческий на престолѣ славы своея, сядете и вы на двунадесети престолѣх, судяще обемонадесетема коленом Израилевым».
Конѣць сказанию.
ЛІТАРАТУРА ДРУГОЙ ПАЛАВІНЫ XVI — ПЕРШАЙ ПАЛАВІНЫ XVII СТАГОДДЗЯ
СЫМОН БУДНЫ
(1530—1593)
[ПРАДМОВА ДА]
Освенцоных княжат и панов их милости панов Мйколаев Радивилов, княжати на Ольще и Несвижу, воеводы Виленьского, навышшего маршалъка и канцлера великого князьтва Литовъского и далей, а княжати на Дубниках и Бержах, воеводы Троцкого, великого гетьмана великого князьтва Литовъского и далей. Сыном перъворожоным их милостям, княжатом молодым, паном Миколаем Миколаевичом Радивилом от бога отца через Христа, единого сына его в духу святом, утешителю, ласки, покою, и вечного благословенья веръного христового збору братья, а слуги их княжацъких милости, веръне жедають.
Бог всемогучый, освѣцоные а милостивые княжата, потому ся всегды напротив грѣешному человѣку заховал, ижь хотя жъ сам от него отходил, пред ся его дивным обычаем от блуда и грѣхов выривал. Тако ся напервей ко оным першим родителем нашим показал. Сих бо,— по оном их тяжком упадку, а по утраченью оного образа и подобеньства божиего, на который были створени в оной первой невинности, святости, справедливости и у правде,— з особливого милосердья своего, в гнѣве своим не рачил зоставити, але ужалившися над их упадком рачил им, заразом и всему потомству их, предивный ратунок урадить, а таковое племя обецать, через которое мѣела быть стерта голова проклятому противнику сатанѣ, и оный упадок знову мѣл быть направлен, и оная первая невинность и справедливость привернена, которое то обетници, о сосланю того светого насенья, ухватившися вѣрою, первые родители наши оною ся ажь до смерти тѣшили и оною жъ приверъненого благославеного живота доступили. Так же сынов и потомст
173
ва их, колько кроть, коли хвала панская нарушена бывала, николи пропоминать не рачил. А потому жь, по оном грозном всее плоти через потоп зглаженю Ноя, а потом Авраама, Исаака, Якова, патриархов святых и всих дванадцати поколений израильских, которые вывел з Египту, тот же от веков милосердный бог занехати не рачил, але им опять оную свою обѣтницу о насенью благославеном якобы знову отновил, в котором мѣели быти благославены вси народы людьские. А тое насенье, водлуг выкладу апостолъского, называется Христос.
А так явне ся и з старого и з нового закону оказуеть, ижь пан бог всякого человека упалого опущати не рачил, а опять ни через жадного иншого збавити не хочеть — одно через Христа пана, оное вечное в благославеное сѣмя, спочатку в раю обецаное, а водлуг выполненя часов, с пречистое девицы нароженое.
Так жеть и теперь, освѣцоные а милостивые княжата, нам, остатнему потомству отцов наших, и пред остатным днем, содравшы слепоту от сердц и очъю нашых, через духа святого и светлость Евангелия сына своего, отец оный всего милосердья учинити рачил, же нам оную выполъненую вечную обетницу Христа пана, которую нам был сатан в пропасти римского и греческого Вавилона затмил, слово его святое нарушил и тайны посквернил, знову праве объяснити, а яко пальцом оказати. А нас, с тое Содомы антихристовой выръвавшы, опять знову ку истинъному збавителю притегнути рачил, которого тут, в тых малых новое кузни книгах, оным славным, здавна далеко росъширеным словеньским языком суть накоротце пописаны права. А вашим кнежацеким милостям, яко тых двух в той Речи Посполитой славных одного коренья филяров, сыном не иншим жадным умыслом, одно, яко и оного часу (абы нихто иначей не судил) и святый Лука евангелист побожьному а зацному Феофилу двое книг своих приписал для много слушных причин,— поданы и приписаны, а звлаща для, зараз з млодости в сердцах из зачатья и занятья милости ку слову божиему. К тому тѣжь и для того, абы ся ваши милости не только в чужоземских языцѣх кохали, але бы ся тежь... и того здавна славного языка словенъского розмиловати и оным ся бавити рачили. Слушная бо речь ест, абы ваши милости того народу язык миловати рачили, в котором давъные предъки и их княжацъекие милости Пановѣ отци ваших милости славне преднейшие преложеньства несуть.
А так он, который сам всего початком и единым от веков збавенья поводом ест пан бог всемогучый, и ваши княжац
174
ские милости еще в молоденстве и знайти рачил. Рачте ж прото его доброти святое въдячными быти а такого гостя зотвороными сердцы приняти, якобы есте были с такого навеженья вдячьными сыны узнаны. Ботсе вашим княжацким милостям, яко се вышей доложило, тот первородный в том языку плод только для самого того офяровал, абысте ваши княжецские милости зацного стану княжата, а передънейшых вожов сынове, всим иншим с себе добрый взор а приклад давать рачили, а тая отчизна и Реч Посполитая з ваших милости благославеное надеи ожидать могла.
Яко есте тогды ваши княжацъские милости с одного коренья леторосли, рачіе жь ся зачать и в том одном правдивом, верном сполъку множить и рость, абы есте ваши княжецъские милости были не только с повинности одное крови, але и з единости одного гасла, единого гетмана Христа рыцерями и братьею а сынми единого навышшего бога! В чом ваши княжецские милости рач помножить и ублагославить бог отец через Христа, единого сына своего, в духу святом утешителю нашим. Того мы вашым княжацъским милостям от нѣего жь самого сердечне жичимо.
А то, што ся на тот час, хотя не с таковое годъности, яковое бы святые таблици божие достойны были, але з якого жь колвек даного таланъту вѣрне от вѣръного Христового збору братьи, а слуг ваших княжацских милости, на том новом початку накоротъце выдать могло, просимо: «Рачъте, ваши княжацские милости, дотуль з ласкою завдячне приимовати, покуль пан бог до чого большого допомочи будеть рачил!»
Дан* з города Несвижьского, от въплощенья Христова в року тисячном пятьсотном иіестьдесятом и втором, месяца июня, дванадцатого дня.
Ваших княжацских милости повольные слуги:
Матфей КАВЕЧИНЬСКИЙ, Симон БУДНЫЙ, Лаврентей КРИШКОВСКИЙ.
К ВСѢМ БЛАГОВѢРНЫМ ХРИСТИАНОМ
ЯЗЫКА РУСКОГО ПРЕДЪСЛОВИЕ В КАТИХИСИЮ
Катихисис — слово ест греческого языка, сказует же ся на словенскую рѣчь — Оглашение или гласом учение.
Вѣдомо бо маеть быти, ижь апостоли и их ученници не тако скоро и не так латвѣ, от еллин или от жидов к вѣре Христовой приступующись, тайнами святыми служили. И окрестил убо Пётрь и иншии апостоли на день съшествиа
175
святого духа от людей израилевых три тисечи, але умиливши их ся сердцем и любезно приемших слово окрестил Филипп, иже от седми диакон царици Муринъское земли каженика или скопца, але аже из Муринъское земли в Еросолим поклонитися приехавъшаго, а наболей через анъгела показаного, от себѣ научоного и еще вѣру о Христе, ижь сын божий ест, исповѣдавъшаго.
Окрестил Петр еще Корънилиа, але оного, которого молитвы и милостины възыдоша пред богом, оного, о котором глас божий в видении по три крать рече, иже бог очистил ест, ты не скверъни, оного, на которого дух святый видимым образом еще научающу Петру напал. Окрестил апостол Сила сторожа темъничъного в Филипъпусѣх, але ажь перъвей к апостолом каючися поведѣл: «Господие, что ми подобаетъ творити, да спасуся?!» Але аже перъвей Павел и Сила глаголаста ему слово господне; еще аже перъвей понял их в дом свой и омыл их раны. Инъшие мѣста опущаю. Досыт бо явъно, ижь апостоли никого от поган и от жидов не крестили, аже перъвей оного научили и в вѣре искусили.
Потом пак и труднейшее искушение было настало на хотящих креститися. Находим бо в посланиах учительских и в некоторих правилѣх, ижь котории ся крестити хотѣли, перъвей через немалый час повинъни били опричь в церъкви стояти, на колѣна припадати, чтение еванъгелское услышавъши, а наболей, коли уже мѣлася вѣчера господня зачинати, вън из церъкви выходити, певъный час поститися и на каждой недели в четверг «вѣрю» пред епископом или пред презвитером исповѣдати. А докул таковые речи кто выполънил, крещон не был, але такового звано оглашеным, а погречески — катикуменос. Науку пак их таковую Оглашением, погрѣчески,— Катихисис.
Был то обычай вельми потребный и пожиточъный, бо затым многые и в познание бога и его правды приходили, и в святом житью росли и укреплялися. К тому и учители мусели своего уряду быти пильными. Лечь диавол не допустил сему обычаю долъго межи христианъми стояти, свящим бо человѣком, по слову еванъгелскому, прииде и въсѣял плевелы, се ест, коли ся ленили учити людей, научил их диавол, абы вѣрили, иж без науки, без вѣры и без исповѣданиа можеть человѣк спасен быти, тольки бы водою в детинъствѣ окрещон был, а пришедши к розуму, только бы в певъные дни мяса не ел, милостину хотя жь от злого набытя давал, святым ся молил и таковые речи заховал.
А на остаток на тое ся спущали, естли кто мѣл, што бы попом по души дал, абы тѣло на посвященой земли поло
176
жили, проводили, поминали, третины, девѣтины, полсорочины, сорочины, полъгодины и годины и инъшие таковые вымыслы чинили. Для того именья, села, мѣста отписовали, монастыри и будованые церъкви надавали, або знову будовали колоколы, потирионы, дыскосы, ризы, иконы или балъваны куповали, надѣваючися для таковых справ спасениа, царствиа божиего и живота вѣчъного. Все тое, мовлю, затым в церъков Христову вошло, ижь он святый обычай, которого ся перъвая церъков по повелению Христову держала, допустили диаволу вывести, а шкодливы он плевел въсѣяти. Христос бо рече: «Шедшей, научите вся языкы, крестяще их!» Тии пак не только не научаютъ, але и сами мало правъды знають и оным, котории бы учити хотѣли, забраняють. Не иначе, но яко пред тым законъники жидовъские. О них же господь рече: «Горе вам, законъником, яко взясте ключь разумению сами не внидосте и въходящиим възбранисте!» Не надобѣ о том много писати. Еси бо вѣдаем, яковых теперь учителей маем.
Вѣдаеть весь свѣт, яко на свои степени въступають. Не тайно тѣ же, яко на них стоять и справуются. Лепъшей плакати, нежели их норовы выписовати. Оно певная рѣчь, ижь напрасно их поправлениа в науцѣ или в житии ждати. Лучшей, абы каждый, кто не хочеть згинути, иншого собѣ лекарства за часу искал, а таковым постыром покой дал. Тако бо повелѣваеть господь, гдѣ к апостолом, се ест всѣм учителем рече: «Вы есте соль земли! Аще же соль обуяеть, чим осолится!?» Ни в что же будеть к тому, точию да и ссыпана будеть вон и попираема человекы. Солью называеть всех учителей, яко бо соль заховуеть што ею посолится, абы не провоняло. Тако и учитель наказанием, поученем и напоминаньем заховуеть людей от духовное гнили. Але если того не чинить, повелѣваеть господь вон его выкинути и потоптати, яко соль, естли бы одурѣла, або силу свою утратила. Чого жь для непослушни есмо того повелениа самого сына божиего?
КНІГІ ОНЛАЙН
