Старажытная беларуская літаратура
Выдавец: Юнацтва
Памер: 350с.
Мінск 1990
Всеслав же сѣде Кыевѣ. Се же бог яви силу крестную: понеже Изяслав цѣловав крест и я й*: тѣмже наведе бог поганыя, сего же явѣ избави крест честный. В день бо Въздвиженья Всеслав, вздохнув, рече: «О кресте честный! Понеже к тобѣ вѣровах, избави мя от рва сего». Бог же показа силу крестную на показанье землѣ Русьстѣй, да не преступаютъ честнаго креста, цѣловавте его; аще ли преступить кто, то и здѣ прииметь казнь и на придущемь вѣцѣ казнь вѣчную. Понеже велика есть сила крестная: крестомь бо побѣжени бывають силы бѣсовьскыя, крест бо князем в бранех пособить, в бранех крестом согражаеми вѣрнии людье побѣжають супостаты противные, крест бо вскорѣ избавляеть от напастий призывающим его с вѣрою. Ничтоже ся боять бѣси, токмо креста. Аще бо бывають от бѣс мечтанья, знаменавше лице крестомь, прогоними бывають. Всеслав же сѣде Кыевѣ мѣсяць 7.
В лѣто 6577 (1069). Поиде Изяслав с Болеславомь* на Всеслава; Всеслав же поиде противу. И приде Бѣлугороду Всеслав, и бывши нощи, утаивъся кыян, бѣжа из Бѣлагорода Полотьску*. Заутра же видѣвше людье князя бѣжавша, възвратишася Кыеву, и створиша вѣче, и послашася к Святославу и к Всеволоду, глаголюще: «Мы уже зло створили есмы, князя своего прогнавше, а се ведетъ на ны Лядьскую землю, а поидѣта в град отца своего; аще ли не
38
хочета, то нам неволя: зажегше град свой, ступим в Гречьску землю». И рече им Святослав: «Вѣ послевѣ* к брату своему; аще поидеть на вы с ляхы губити вас, то вѣ противу ему ратью, не давѣ бо погубити града отца своего; аще ли хощеть с миромъ, то в малѣ придеть дружинѣ». И утѣшиста кыяны. Святослав же и Всеволод посласта к Изяславу, глаголюща: «Всеслав ти бѣжал, а не води ляхов Кыеву, противна бо ти нѣту; аще ли хощеши гнѣв имѣти и погубити град, то вѣси*, яко нама жаль отня стола». То слышав Изяслав, остави ляхы и поиде с Болеславом, мало ляхов поим; посла же пред собою сына своего Мьстислава Кыеву. И пришед Мьстислав, исѣче кияны, иже бѣша высѣкли Всеслава, числом 70 чади, а другыя слѣпиша, другыя же без вины погуби, не испытав. Изяславу же идущю к граду, изидоша людье противу с поклоном, и прияша князь свой кыяне; и сѣде Изяслав на столѣ своемь, мѣсяца мая в 2 день. И распуща ляхы на покорм, и избиваху ляхы отай; и възвратися в Ляхы Болеслав, в землю свою. Изяслав же възгна торг на гору и прогна Всеслава ис Полотьска, посади сына своего Мьстислава Полотьскѣ; он же вскорѣ умре ту. И посади в него мѣсто брата его Святополка, Всеславу же бѣжавшю.
В лѣто 6578 (1070). Родися у Всеволода сын, и нарекоша именем Ростислав. В се же лѣто заложена бысть церкы святаго Михаила в монастырѣ Всеволожи.
В лѣто 6579 (1071). Воеваша половци у Растовьця и у Неятина. В се же лѣто выгна Всеслав Святополка ис Полотьска. В се же лѣто побѣди Ярополк Всеслава у Голотичьска. В си же времена приде волхв, прелщен бѣсом; пришед бо Кыеву глаголаше, сице повѣдая людем, яко на пятое лѣто Днѣпру потещи вспять и землям преступати на ина мѣста, яко стати Гречьскы земли на Руской, а Русьскѣй на Гречьской, и прочим землям измѣнитися. Его же невѣгласи послушаху, вѣрнии же смеяхутъся, глаголюще ему: «Бѣс тобою играетъ на пагубу тобѣ». Се же и бысть ему: в едину бо нощь бысть без вѣсти.
Бѣси бо подътокше на зло вводить; посем же насмисаются, ввергъше й в пропасть смертную, научивше глаголати, якоже се скажем бѣсовьское наущенье и дѣйство.
В лѣто 6581 (1073). Въздвиже дьявол котору в братьи сей Ярославичих. Бывши распри межи ими, быста с себе Святослав со Всеволодомъ на Изяслава. Изиде Изяслав ис Кыева, Святослав же и Всеволод внидоста в Кыев, мѣсяца марта 22, и сѣдоста на столѣ на Берестовомъ, преступаема заповѣдь отню. Святослав же бѣ начало
39
выгнанью братню, желая болшее власти; Всеволода бо прелсти, глаголя, яко «Изяслав сватится со Всеславом, мысля на наю; да аще его не варивѣ, имать нас прогнати». И тако взостри Всеволода на Изяслава. Изяслав же иде в ляхы со имѣньем многым, глаголя, яко «Симь налѣзу вой». Еже все взяша ляхове у него, показавше ему путь от себе. А Святослав сѣде Кыевѣ, прогнав брата своего, преступив заповѣдь отню, паче же божью. Велий бо есть грѣх преступити заповѣдь отца своего: ибо исперва преступиша сынове Хамови на землю Сифову, и по 400 лѣт отмьщенье прияша от бога, от племене бо Сифова суть еврѣи, иже избивше Хананѣйско племя, всприяша свой жребий и свою землю. Пакы преступи Исав заповѣдь отца своего, и прия убийство; не добро бо есть преступати предѣла чюжего. В се же лѣто основана бысть церкы Печерьская игуменомь Феодосьемь и епископомъ Михаиломъ, митрополиту Георгию тогда сущю в Грьцѣх, Святославу Кыевѣ сѣдящю.
В лѣто 6600 (1092). Предивно бысть чюдо Полотьскѣ в мечтѣ: бываше в нощи тутън, станяше по улици, яко человѣци рищюще бѣси. Аще кто вылѣзяше ис хоромины, хотя видѣти, абье уязвен будяше невидимо от бѣсов язвою, и с того умираху, и не смяху излазити ис хором. Посемь же начата в дне являтися на коних, и не бѣ их видѣти самѣх, но конь их видѣти копыта; и тако уязвляху люди полоцкыя и его область. Тѣмъ и человѣци глаголаху, яко навье* бьють полочаны. Се же знаменье поча быти от Дрьютьска. В си же времена бысть знаменье в небеси, яко круг бысть посредѣ неба превелик. В се же лѣто ведро бяше*, яко изгараше земля, и мнози борове възгарахуся сами и болота; и многа знаменья бываху по мѣстомъ; и рать велика бяше от половецъ и отвсюду; взяша 3 грады: Пѣсочен, Переволоку, Прилук*, и многа села воеваша по обѣма странома. В се же лѣто воеваша половци ляхы с Василькомъ Ростиславичемь*. В се же лѣто умре Рюрик, сын Ростиславль. В си же времена мнози человѣци умираху различными недугы, якоже глаголаху продающе корсты, яко «Продахом корсты от Филипова дне до мясопуста* 7 тысячъ». Се же бысть за грѣхы наша, яко умножишася грѣси наши и неправды. Се же наведе на ны бог, веля нам имѣти покаянье и въстягнутися от грѣха, и от зависти и от прочих злых дѣл неприязнин.
В лѣто 6609 (1101). Преставися Всеслав, полоцкий князь, мѣсяца априля в 14 день, в 9 час дне, в среду. В то же лѣто заратися Ярослав Ярополчичь Берестьи
40
и иде на нь Святополк, и заста й в градѣ, и ем й, и окова, и приведе й Кыеву. И молися о нем митрополит и игумени, и умолиша Святополка, и заводиша й у раку святою Бориса и Глѣба, и снята с него оковы, и пустиша й. Томь же лѣтѣ совокупишася вся братья: Святополк, Володимер, и Давыд, и Олег, Ярослав, брат ею, на Золотьчи. И прислаша половци слы от всѣх князий ко всей братьи, просяще мира. И рѣша им русскыи князи: «Да аще хощете мира, да совокупимся у Сакова». И послаша по половцѣ, и сняшася у Сакова, и створиша мир с половци, и пояша тали межи собою, мѣсяца семтября в 15 день, и разидошася разно.
В лѣто 6612 (1104). Ведена дщи Володарева за царевичь за Олексиничь, Цесарюгороду*, мѣсяца иулия в 20. Томь же лѣтѣ ведена Передъслава, дщи Святополча, в Угры, за королевичь, августа в 21 день. Том же лѣтѣ приде митрополит Никифор в Русь, мѣсяца декабря в 6 день. Того же мѣсяца преставился Вячеслав Ярополчичь в 13 день. Того же мѣсяца в 18 Никифор митрополит на столѣ посажен. Се же скажем: сего же лѣта исходяща, посла Святополк Путяту на Мѣнеск, а Володимер сына своего Ярополка, а Олег сам иде на Глѣба, поемше Давыда Всеславича; и не успѣша ничтоже и възвратишася опять. И родися у Святополка сын, и нарекоша имя ему Брячислав. В се же лѣто бысть знаменье: стояше солнце в крузѣ, а посредѣ круга кресть, а посредѣ креста солнце, а внѣ круга обаполы два солнца, а над солнцемь, кромѣ круга, дуга рогома на сѣвер; тако же знаменье и в лунѣ тѣм же образом мѣсяца февраля в 4 и 5 и 6 день, в дне по 3 дни, а в нощь в лунѣ по 3 нощи.
В лѣто 6613 (1105). Постави митрополит епископа Анфилофия Володимерю мѣсяца августа в 27 день. Томь же лѣтѣ постави Лазаря в Переславль ноября в 12. Томь же лѣтѣ постави Мину Полотьску декабря в 13 день.
В лѣто 6614 (1106). Воеваша половци около Зарѣчьска, и посла по них Святополк Яня и Иванка Захарьича, Козарина: и угониша половцѣ и полон отяша. В се же лѣто преставися Янь, старець добрый*, жив лѣт 90, в старости маститѣ; жив по закону божью, не хужий бѣ первых праведник. От него же и яз многа словеса слышах, еже и вписах в лѣтописаньи семь, от него же слышах. Бѣ бо мужь благ, и кроток, и смѣрен, огрѣбаяся всякоя вещи, его же и гроб есть в Печерьском монастыри, в притворѣ, идеже лежить тѣло его, положено мѣсяца иуня в 24. В се же лѣто пострижеся Еупракси, Всеволожа дщи,
41
мѣсяца декабря в 6. В то же лѣто прибѣже Избыгнѣв к Святополку*. В то же лѣто пострижеся Святославь, сын Давыдов, внук Святославль, мѣсяца февраля в 17 день. Том же лѣте побѣдиша зимѣгола Всеславичь, всю братью, и дружины убиша 9 тысящь.
В лѣто 6615 (1107), индикта, круг луны 4 лѣто, а солнечнаго круга 8 лѣто. В се же лѣто преставися Володимеряя*, мѣсяца мая в 7 день. Того же мѣсяця воева Боняк и зая конѣ у Переяславля. Том же лѣтѣ приде Боняк, и Шарукан старый и ини князи мнози, и сташа около Лубьна. Святополк же, и Володимер, и Олег, Святослав, Мстислав, Вячеслав, Ярополк идоша на половци к Дубну, и в 6 час дне бродишася чрес Сулу, и кликнута на них. Половци же ужасошася, от страха не възмогоша ни стяга поставити, но побѣгоша, хватающе кони, а друзии пѣши побѣгоша. Наши же почаша сѣчи, женущи я, а другыѣ руками имати, и гнаша ноли до Хорола. Убиша же Таза, Бонякова брата, а Сугра яша и брата его, а Шарукан едва утече. Отбѣгоша же товара своего, еже взяша русский вой, мѣсяца августа в 12, и възвратишася всвояси с побѣдою великою. Святополк же приде в Печерьскый манастырь на заутреню на Успенье святыя богородица, и братья цѣловаша й с радостью великою, яко врази наша побѣжени быша, молитвами святыя богородица и святаго отца нашего Феодосья. Так бо обычай имѣяше Святополк: коли идяше на войну, или инамо, оли поклонивъся у гроба Феодосиева и молитву взем у игумена, ту сущаго, то же идяше на путь свой. В то же лѣто преставися княгини, Святополча мати, мѣсяца генваря в 4 день. Томь же лѣтѣ, мѣсяца того же, иде Володимер, и Давыд,и Олег к Аепѣ и ко другому Аепѣ, и створиша мир. И поя Володимер за Юргя Аепину дщерь*, Осеневу внуку, а Олег поя за сына Аепину дчерь, Гиргеневу внуку мѣсяца генваря 12 день. А февраля 5 трясеся земля пред зорями в нощи.
КНІГІ ОНЛАЙН
