Старажытная беларуская літаратура
Выдавец: Юнацтва
Памер: 350с.
Мінск 1990
По малых же часех умреть брат его, который мешкал на Юрборъку, не маючы детей. И брат его Кунос озмет и тую часть брата своеіо Борка и город Юръборк и в той части его будет пановати. И оное княже Кунос мѣл двух сынов; одного Кернуса, а другого Кгинбунта. И пануючы ему в земли Жомоитской почалъся множыти и розшырати и выходити на реку Велю в землю Завельскую. И перешодъшы реку Святую вышей, и нашол мѣсто вельми хороше. И сподобалося ему тое мѣстцо вельми. Тогды он там поселил сына своего Кернуса. И назвалося тое местцо по Кернусе — Керново. А потом Кунус умре. И по нем почнеть сын его Кернус пановати на всей земли Завельской по границу Латыгольскую и по Завельский Брасълавль, оли ж по реку Двину, а брат его Кгинбунт — на Юрборъку и на Кунусове и на всей земли Жомоитской.
А в тот час, гдѣ Кернус пановал на Завельской стороне, люди его тые, што за. Велею осѣли, игривали на трубах дубасных. И прозвал тот Керънус берег своим языком властным по латыни — литус,— где ся люди его множат. А трубы, што на них играют — туба. И дал имя тым людем, своим языком по латине, зложывшы берег с трубою,— литусба. И простые люди не вмели звати по латине и почали звати Литвою. И от того часу почали звати панство Литовское и множытися от Жомоити.
И князь великий Кернус пановал на Литве, а княз Кгинбунт на Жомоити. И не малый час пановали. И жыли межы собою вов покои. И князь Кернус не мѣл сынов, толко одну дочку именем Пояту. И будучы он у старости своей и, не хо
108
течы панства своего от дочки своее отдалити, и прынял до неи и зятем своим его вчынил собѣ с Китавруса именем своим Кируса, сына Довпрункгова з Дявильтова. И сам умер. А по нем начне княжыти на земли Литовской тот зять его с Китаврус — Кгирус. А Кгинъбунт, пануючы на Жомоити, и умер, а сына своего Монтвила зоставить на князьстве Жомоитском.
И Монтвил много лѣт княжыл на Жомоити и мѣл двух сынов: одного Немоноса, а другого Скиръмонта. А в иншых тых жэ называ Викента и Ердвила.
И часу панованья Монтвилова повстал цар Батый и пошол на Рускую землю, и всю Рускую землю звоевал и князей руских постинал, а иншых у полон повел, и столец всее Руское земли город Киев зъжог и пуст учынил. А князь великий киевский Дмитр, боечыся великое силы и моцы его, збѣг с Киева до города Чернигова. И потом довѣдалъся, што город Киев сожжон и вся земля Руская спустошона. И слышал, иж мужыки мешъкают без господара, а зовутся Дручане. И он собравшыся з людми своими и пошол ко Друцку, и землю Друцкую посѣл, и город Друческ зарубил, и назвалъся великим князем Друцким. И в тот час доведался великий князь Монтвил Жомоитский, иж Руская земля спустошона и князи руские розогнаны. И он, давшы войско сыну своему Еръдивилу, и послал з ним панов своих радъных, напервей с Колюмнов Трумъпя, а другого с Уръсинов именем Эйкъшыса, а третего з Рож именем Кгровжыса. И зашли за реку Велю, и потом перешли реку Немон. И нашли в чотырох милях от реки Немна гору Красну, и сподобалося им и вчынили на ней город, и назвали его Новгородок. И вчынил собѣ княз великий в нем столец, и назвался великим князем Новгородским. И пошедшы з Новагородка и зарубил город Городно. И потом пошол до Берестья, и нашол Берестѣи и Дорогичын и Мельник от Батыя спустошоны и покажены. И он тые городы зарубил и почал на их княжыти. А потом умер княз великий Монтвил Жомоитский.
По нем сѣл на великом княженьи Жомоитском Викент, а другий вышереченый сын его Ердвил почнеть мешкати и пановати на Новегородцы и на тых вышей реченых городех. И подавал паном своим, которые з ним вышли островы и пущы. Грумпю дал остров коло реки Ошмены, которое тепер зоветься Ошмена, и все прылежачое к Ошмене, што тепер князи и панове в повете Ошменском держать. А Эйкъшневи дал остров, который по нем назван ест Эйшышки, и все прылежачое к повѣту Эйшышскому. А Кгров
109
жу дал остров, который его именем назван ест Кгровжышкй, и увесь повѣт Кгровъжыский. И с Трумпя народился Кгаштолт, а з Эйкъша народился Довоина, а з Кгровжа народился Монъвид, а потом умер.
Пануючы великому князю Викенту в Жомоитской земли, а Ердивилу у Новегородцэ и в ыншых городех. Потом умер князь великий Викен. И по нем начнетъ княжыти Жывинбут, с Китаврусу, князь литовский, обема тыми княжаньи: Литвою и Жомоитью. А Ердивил на Новегородцэ и на всих тых городех руских. И много лѣт княжывшы Ердивил на тых городех и умер. И по нем почал сын его княжыти Мингаило.
По смерти пак отца своего княз великий Мингаило, собравшы войско свое, и поидеть на город Полтэск и на мужы Полочане, которые вѣчем справовалися, як Великий Новгород и Псков. И напервей прышли к городу их реченому Городъцу. И мужы полочане, собравшыся с полъки своими и стрѣтили их под Городцом. И великии бои и сѣчу межы собою мѣли. И поможетъ бог великому князю Минкгаилу. И побил мужей Полочан на голову, и город их зъжог на имя Городец. И город Полтэск возметь и зостал великим князем полоцким. И будучы ему великим князем новгородским и полоцким пановал много лѣт и вмер. И оставил по собѣ двух сынов своих: одного Скирмонта, а другога Кгинвила. И Скирмонт почнетъ княжыти на Новегородъцы, а Кгинвил на Полоцку.
И пойметъ Кгинвил дочку у великого князя тверского у Борыса именем Марю, для которое ся окрестил у рускую вѣру и дали ему имя Борыс. И мѣл с нею сына именем Рогволода, которого назвал руским именем Василей. И тот Кгинъвил, реченый Борыс, вчынил город на имя свое на рецэ Березыни, и назвал его Борысов. И будучы ему русином был велми набожон. И вчынил цэрков каменую в Полоцку святое Софѣи, а другую святого Спаса — девичый манастыр у верх реки Полоты, от города у полумилю, а третюю цэрковманастыр на Бельчыцы святого Борыса и Глѣба.
И пануючы ему в Полоцку был ласкав на подданые свои. И дал им волность вѣчем ся судити и в звон звонити, и потому ся справовати як у Великом Новегороде и Пъскове. И што князь Борыс мѣл с тою жоною сына Рогволода, нареченого Василя. И по нем почнеть княжыти сын его Василей у Полоцку. А сам умер.
И князь Василей, княжечы на Полоцку, мѣл сына Глѣба, а дочку Парасковѣю. И тая Парасковѣя обецалася дѣвство свое заховати в цэлости до жывота своего. И пострыглася
НО
в чернцы у светого Спаса, у манастыры над Полотою, и мешкала там сем лѣт, богу служены и книги пишучы на цэрков. А потом забралася до Рыма и в Рыме, мешкаючы, богу служила пилне. И мешкала колко год и осветилася, которую называют санкта Прекседыс, а по рускии Паросковѣя, которой же в Рыме и костел збудован на имя ее святое, там жэ ее и положили. А брат ее, князь Глѣб Полоцкий, у молодых лѣтех своих, кнежывшы у Полоцку немного лѣт, и вмер. И положон ест у Полоцку у святое Софѣи со отцэм своим у в одпом гробе. А полочане почали потому справоватися, як у Великом Новгороде и в Пъскове, а пана над собою не мѣли.
Скирмонту ж княжечы на Новегородцы. И князь Мъстислав луцкий и пинский почнет вальку с князем Скирмонтом, хотечы его выгнати з отъчызны своее: з Берестя, а з Мельника, и з Городна, и з Новагородка. И Скирмонт пошлет послов своих до великого князя литовского, што вышол с Китавруса до Жывинбута, просечы его, абы помоч дал ему напротивко Руси. И князь великий литовский Жывинбут пошлетъ ему на помоч сына своего старшого, Куковоитя, со всими силами своими литовскими и жомоитскими. И покдет князь великий Скирмонт с Куковотем и со всими силами на противку Мъстислава, князя луцкого и пинского. И на сей стороне реки Яселъды поразит князь Скирмонт князя луцкого и пинского на голову и всю раду рускую, толко князь Мстислав в малой дружыне ледве сам утек у город Луцко. А князь великий Скирмонт возмегь город Пинск и город Туров. И заплакала Рус великим плачом, иж так окрутне вси побиты от бэзбожное Литвы.
И князь великий Скирмонт сына великого князя литовского Жывинбутова Куковотя чостовавшы и даровавшы безчысленое множество золота и серебра и боръздыми конми и отпустил почстиве до отца его, до великого князя Жывинбута литовского.
И коли Куковот прыидеть до отца своего Жывинбута, и не много пры отцы своем побывшы, и потом князь великий Жывинбут литовский и жомоитский умер. Тогды сын его Куковот сѣл на великом кнежени Литовском и Жомоитском.
Будучы пак в тот час царем Завольским именем Булаклай и прыслал послов своих до великого князя Скирмонта, штобы ему выходы его давал и баскаки его ховал по тым городом по тому, як с тых городов хожывали за предков яго князей руских. И князь великий Скирмонт
111
под тое поддатися не хотѣл, и тым послом его носы, губы и ушы урѣзати казал, и до него отпустил.
И тот цар на лѣто собравшыся з многими силами своими и оръдами татарскими и пошол на Рускую землю. И много зла Руской земли учынил.
А князь великий Скирмонт, собравшы вси войска свои, и подкал его на границы своей у Койдонове, и поразил того цара и всю рать татарскую побил и самого цара убил. И з звитяжством великим пошол на Рускую землю. И взял город Мозырь, Чернигов и Стародуб и Корачев. И со всими в цэлости, звитяжство одержавшы, вернулъся назад. И мѣл князь великий Скиръмнт трех сынов: старшый Тронята, другий Люборт, третий Писимонт.
Князь великий Скирмонт у великой старости своей умер, а сын его Люборт сядет на Корачеве и назовется князь Корачевский, а Писимонт на Турове сядет, а Тронята на Новегородцэ. И пановали на тых городех много лѣт.
В тых лѣтех мати князя великого литовского и жомоитского Куковотева Поята умерла у великой старости своей. И князь великий Куковоит, милуючы матку свою, и вчьшил балвана на образ ее, чынечы ей паметку. И поставил того балвана именем матки своее Пояты вышей озера Жослии, который же образ хвалили и за бога его мели. А потом тот балван зъгнил, и на том мѣстцы липы выросли. И тые липы хвалили и за бога их мѣли во имя тое Пояты оли ж и до сего дня. А за тым князь великий литовский и жомоитский Куковоит, милуючы подъданых своих, и сам умер.
И зоставил по собѣ сына на великом кнежени Литовском и Жомоитском именем Утенуса, который же сын, милуючы отца своего великого князя Куковоита, и вчынил балъвана на паметь отца своего. И поставил его на горе одной над рекою Святою, недалеко Дявилтова, которого ж хвалили и за бога мели. А потом тот балван згнил, и там гай вырос. И люди тым хвалили, и прозвали его именем пана своего Куковоита.
КНІГІ ОНЛАЙН
