Старажытная беларуская літаратура
Выдавец: Юнацтва
Памер: 350с.
Мінск 1990
Троняте пануючы на Новегородцэ. И в тот час цар Завольский Курдас повстал з многими силами татарскими на Руские земли. И князь Тронята зберется з братею своею: с князем Писимонтом Туровским а с князем Любортом Карачевским и со всими силами, и к тому обослалъся с князми рускими: с князем Семеном Михаиловичом Друцким, и с князем Давыдом Мъстиславовичом Луцким и Светославом Киевским. И собравшыся с одного и пошли против цара Курдаса и всее рати его Завольское. И поткалился с ним за Мозырем на рецэ Окуневъцы, и вдарылися
112
в полки межы собою, и вчынили бой вельми великий от пораня оли ж до вечора. И поможетъ бог великому князю Тронэте и князем руским. Цара Курдыса и все войско на голово побили. Ледве сам цар у малой дружыне втек. И в том бою убили двух братов князя Тронятиных: князя Писимонта Туровского, а князя Люборта Корачевъского, а князя Семена, сына князя друцкого Михаила, а князя Давыдова, сына Луцъкого Андрея. И иных бояр много побили. И князь великий Тронята звитяжство одержавшы и добытку великого, золота, и серебра, и каменя и жэмъчугу, и шат дорогих набравшы, и пошол у свою землю. А князи руские также у свои городы пошли.
И пануючы князю Троняте не мало лѣт, потом умер. И зоставил сына по собе на великом кнежени Новгородском Олькгимонта. И кнежыв Олькгимонт не мало, потом умер, и зоставил по собѣ сына именем Рьшкголта на великом кнежени Новъгородском.
И кнежычы Рынкголту не мало лѣт на Новегородцы и на иншых городех руских. И вчынять змову межы собою князи руские почати вальку против великого князя Рынкгольта, и хотечы его согнати з отчызны своее городов руских, напервэй Светослав Киевский, а Лев Володымеръский и Дмитрей Друцкий. И собравшыся вси тры полки и пошли против великого князя Рынкголъта. И взяли тые руские князи татар на помоч собѣ от цара Заволского неколко тисеч татар. И князь великий Рынкгольт потъкал их на рецэ Немне на Могильной. И вчынил з ними бой вельми великий, и билися межы собою велми крѣпко, почоншы от пораня оли ж до вечера. И поможе бог великому князю Рынкголту, иж князей руских и всю силу их и орду татарскую на голову побил и сам, звитяжство одержавшы, з великим весэльем и добытком золота и серебра, и з великим набытем скарбов, и прышол к своим городом. И прышедшы до Новагородка, рознемогъся и вмер без плоду. Тут ся доконал род княжати рымского Палемона.
А иные поведают, рекучы, бы тот Рынкголт, прышедшы з оного побоища до Новагородка и был у Новегородцы, и якобы мѣл уродити трех сынов и зоставит по собѣ на великом кнежени Новгородѣском именем Воишвилака, ино далей о том Воишвилаку не пишеть.
113
О княжати Литовском Швинъторозе, сыне Утенусове
По смерти Рынкголтове панове, жалуючы господара своего прырожоного, и взяли собѣ господарем великого князя литовъского и жомоитского, сына Утенусова с Китаврусу, Швинъторого. И мало кнежывшы Швинторогу на Новгородъцы и на руских городех. И отец его, князь великий литовский и жомоитский, Утенус умер. И сын его Швинъторог по смерти отца своего начнет кнежыти на великом кнежени Литовском и Жомоитском, и Новгородском и Руском. И вродил Швинторог сына Скирымонта. И оберет собѣ великий князь Швинторог мѣстцо на пущы велми хорошо, подле реки Вельи, гдѣ река Вилня упадывает у Велю. И просил сына своего Скирымонта, абы на том местцу было жъглищо вчынено, гдѣ бы его мертвого сожгли. И прыказал сыну своему, жебы по смерти его на том мѣстцу, гдѣ бы его зъжог, всих князей литовских и знаменитых бояр сожъжено было, и штобы вже нигдѣ инъде тѣла мертвых не были зъжены толко там, бо и перед тым жыгали тѣла мертвых на том мѣстцу, хто гдѣ умреть. И прыказавшы тые слова сыну своему Скирымонту, князь великий Швинъторог и вмер.
О великом князе Скирымонте
Великий князь Скирымонт зостал по отцы своем на великом князстве Литовском, Жомоитском и Руском и, подлуг прыказаня отца своего, на том мѣстцы на усти реки Вилни, гдѣ у Велью упадываеть, вчынил жъглищо. И там тѣло отца своего зъжог и коня его, на котором еждчывал, и шату его, которую ношывал, и милосника его, на которого он был ласкав, и сокола и хорта его зъжог. И от тых часов князи великие литовские тѣла их на том мѣстцу жыгали. И для того тое мѣстцо от тых часов прозвано Швинторога, на имя того великого князя.
И коли которого князя великого литовского, албо пана сожжено было тѣло, тогды пры них кладывали ногъти рыси, албо медвежи, для того, иж вѣру тую мели, якобы судный день мѣл быти. И так знаменали собѣ, иж бы бог мѣл прьшти и седѣти на горѣ высокой и судити жывых и мертвых, на которую ж гору трудно будеть узыйти бэз тых ногьтей рысих, албо медвежых. И для того тые ногти подле их кладывали, на которых мѣли на тую гору лѣзти и на суд до бога ити. А так ачколвек поганы были, а въжды потом себе
114
знаменали и в бога одного вѣрыли, иж судный день мѣл быти. И вѣрыли з мертвых въстаню и одного бога, которы мѣл судити жывых и мертвых.
О мужах латыголъских як прышли у Жомоить
Пануючы великому князю Скирымонту, и собралися мужы латыголове, которые седели над берегом морским, окияном, морем и прышли в землю Жомоитскую, и шкоды многие почынили, и кровопролитья в людех Жомоитских от них много стало. И князь Скирмонт собравшыся з силами своими и поидеть на них в землю их. И их самых выстинал, а иншых у полон вывел, и землю их пусту вчьшил.
И в тот час, по выеханю князя великого Скирмонта з земли Латыгольское, прышли нѣмцы з за моря до тое ж земли Латыголское и тую землю засели. И панове той Латыголе зостали и назвалися Ифлянты. И потом много лѣт пановал великий князь Скирмонт и зоставил двух сынов: Трабуса а Коликгина. И Трабус почнет кнежыти на земли Жомоитской, а Коликгин на земли Литовской и Руской. И кнежыл много лѣт и вмер. И почнеть по нем кнежыти сын его Роман. И по малом часе умре князь великий жомоитский Трабус, дядко князя Романов.
И по нем почнет кнежыти князь великий Роман на земли Жомоитъской и Литовской и Руской. И Роман мѣл пяти сынов: старший был Нарымонт, другий Довмонт, третий Гольша, четвертый Кгедрус, пятый Троиидень.
О пяти сьшех Романовых
По смерти великого князя Романа почнет кнежыти его сын старшый Нарымонт. И вчынил город Кернов, и знесеть столец свой з Новагородка до Кернова, и почнеть кнежыти и назовется великий князь литовский и новгородский и жомоитский.
А брат его Довмонт седит на отчызне своей на Утене, и назовется князем Утенским. А третий брат его Кгедрус зарубил город и назовет его именем своим — Кгедроити и прозоветься князем Кгедроитьским. А четвертый брат его Гольша, передшы (так!) реку Велю, и нашол гору красную межы горами над рекою Вилнею у мили от устья реки Вельи, гдѣ упадывает в реку Велю против Раконтишок, и вчынил город и назоветь его именем своим Гольшане.
И не много бывшы там. И ездечы оттоль у ловы у пущу
115
за десеть миль от того города своего и найдет гору красную, и ровънинами великими объляглую, и обфитостями наполъненую. И сподобалося ему там, и он там поселилъся и на той горе учынил город над рѣчкою Кораблем. И перенесеться оттоле и там почнеть кнежыти и назоветься князем Гольшанским.
А пятый брат Троиидень мешкал пры брате своем великом князе Нарымонъте. И довѣдался князь великий Нарымонт, што ж князи Ятвезъские померли, а люди их мешкают без господара. И князь Нарымонт поидеть на них. И они не противечыся поддалися и поклонилися ему. А так он, оставшы им господарем и вземшы их, дал брату своему Троииденю за вдѣл. И князь великий Троиидень наидеть гору красную над рекою Бебрею. И сподобалося ему там вельми и зарубил город и назоветь его Раигород, и прозоветься князем Ятвезским и Доиновъским.
И будучы ему там на кнежени великие вальки чынил з Ляхи, и з Русью и з Мазовшаны, и завжды зыскивал и над землями их силные окрутенства чынил, што нижей описуеть у руской кроиницэ, их горъшый был тым землям и окрутнейшый на них, нижли Антиох Сирский и Ирод Иерусалимский и Нерон Рымский, што так был окрутный и валечный.
Князь же великий Нарымонт поиметь жону у ифлянтского реченого Флядры дочку его, и брат его Довъмонт у того ж Флядры другую дочку его. И, не малый час жывучы, рознеможется жона князя Домонътова Утенского и вмерла. И князь великий Нарымонт, слышавшы смерть невѣстки своее, жаловал вельми и, будучы сам немоцон, и послал жону свою до брата своего Довмонъта, жалуючы жалости его. И коли прыехала жона Нарымонтова до Утены, жалуючы девера своего князя Довъмонта, и князь Довмонт, видевшы невѣстку свою, возрадовался вельми а рекл так: «Мнѣ было жоны искати, а се мнѣ бог жону дал». И понял ее за себе. И в том стала великая брань и ростыржъка межы братею: великим князем Нарымонтом и князем Довъмонтом.
И князь великий Нарымонт, видечы жалост свою великую, иж брат его жону его за себе гвалтом взял, и обослал братю свою: князя Кгедроитя, и князя Гольшу, и князя Троииденя, и тестя своего Флядра Ифлянтского. И собравшыся з братею и со всими людми своими, и потягнул на брата своего князя Довмонъта, и обогнал его у городе его Утене. И порозумел князь Довмонт, што ся не мог ему оборонити, и просил горожан своих, абы ему не подали города, поколь бы он прошол войско Нарымунтово. И сам спустилъ
116
ся з города. И прошодшы войско Нарымунтово, и побежыт. И прыидет к городу Пъскову. Ино мужы пъсковские, видечы его мужа добра, и честна и розумна, и взяли его собѣ господарэм и назвали его великим князем Пъсковским.
А Нарымунт, узявшы город Утену и жону свою, и княжыл на Кернове и на Новегородцы и на Жомоити. А Довъмонт на Пъскове. И обадва не малый час кнежыли.
Троиидень пак пойметъ жону у княжати Мазовэцкого, дочку его. И мѣл з нею сына реченаго Рымонта. И коли сын его Рымонт доростал лѣт своих, и отец его Троиидень дал его для науки языка руского до Льва Мъстиславича, который заложььт город во имя свое — Львов. И мешкаючы Рымонту у князя Льва, и навчылся языка руского. И сподобалося ему вѣра хрестиянская и окрестилъся. И врозумѣл, иж тот свѣт ничого не есть. И опустившы свѣт, и пострыгься в чернъцы, и названо имя ему Василий, а прозвищом Лаврыш. И будучы ему в чернъцох, прышол до дядка своего Нарымонса и просил его, абы ему дал в Новогородском повѣте мѣстцо на пущы подле реки Немна, гдѣ бы собѣ манастыр збудовать мѣл. И он ему допустил. И он собѣ там манастыр збудовал. И поставил напервей церъков святого Воскресенья. И оттоле прозвано Лаврышов манастыр. И будучы ему у манастыры, дядко его умреть. И панове литовские и жомоитские взяли собѣ великим князем Троиденя. И пануючы великому князю Троиденю, и князь великий Довмонт, пришодъшы зо Пъскова, возметь город Полътэск и почнеть княжыти на Пъскове и на Полоцку. И жаль ему было того велми, иж брат меншый осѣл панство у Литве. И почал о том мыслити, як бы его мѣл о смерть прыправити. А в тых часех пануючы Троиденю, умерли ему обадва браты: князь Гольша а князь Кгедрус. А з оное вышейписаное вазни князь великий Довмонт направил шесть мужыков на брата своего Троиденя забити, яко ж он шол безпечне собѣ з лазни в Новгородку. И тые мужыки его зрадне забили. И сам Довмонт, собравшыся з людми своими пъсковскими и полоцкими, и потягнул до Литвы, хотечы быти князем литовским и жомоитским.
КНІГІ ОНЛАЙН
